Kif tiġbor il-fondi

L-organizzazzjoni ta’ Inizjattiva taċ-Ċittadini Ewropej (IĊE) hija sforz li għandu bżonn tim iddedikat, ippjanar strateġiku u riżorsi finanzjarji. Kull fażi ta’ kampanja transnazzjonali tal-IĊE, mit-tħejjija sal-eżekuzzjoni, għandha bżonn ir-riżorsi biex tiġi żgurata l-effikaċja. Minħabba d-diversità lingwistika tal-Ewropa, il-materjali jridu jiġu tradotti f’diversi lingwi biex jintlaħqu s-sostenituri b’mod effettiv f’kull lokalità. Filwaqt li l-voluntiera spiss ikollhom rwol ewlieni, se jkollok bżonn staff iddedikat għall-koordinazzjoni, il-gwida legali, u biex tilħaq kemm jista’ jkun nies. Barra minn hekk, il-bini ta’ preżenza b’saħħitha permezz ta’ sit web, il-media soċjali u l-avvenimenti pubbliċi għandhom bżonn ta’ finanzjament. Il-konsultazzjonijiet legali, il-materjali tal-kampanja, ir-reklamar - diġitali u tradizzjonali - jistgħu jikkontribwixxu aktar għall-ispejjeż tal-kampanja. Huwa essenzjali li tifhem dawn l-eżiġenzi finanzjarji biex tiżgura kampanja strutturata tajjeb u sostenibbli. 

Ibda kmieni u b’mod strateġiku

Huwa essenzjali li tibda l-isforzi għall-ġbir tal-fondi fi stadju bikri biex tiżgura r-riżorsi meħtieġa għall-inizjattiva taċ-ċittadini Ewropej tiegħek. Biex iżżid iċ-ċansijiet tiegħek li tirnexxi, ara li tiżgura l-finanzjament għall-attivitajiet inizjali, bħall-iżvilupp tas-sit web jew l-immappjar tas-sħab qabel it-tnedija uffiċjali tal-IĊE tiegħek. Idealment, tibda tiġbor il-fondi saħansitra qabel ma tirreġistra l-inizjattiva tiegħek.  

Għandek ukoll taħseb bil-quddiem: iġbor il-fondi f’jiem ta’ sensibilizzazzjoni speċjali matul is-sena li jirriflettu s-suġġett tal-IĊE tiegħek. Avvenimenti bħal festivals politiċi, jew “Jiem” relatati ma’ suġġett: il-Jum Internazzjonali tan-Nisa, Jum id-Dinja, il-Jum Dinji tas-Saħħa, jew il-Jum tad-Drittijiet tal-Bniedem jipprovdu opportunitajiet eċċellenti biex tiġbor il-fondi u żżid il-viżibbiltà. Dawn l-okkażjonijiet jattiraw l-attenzjoni tal-media, il-parteċipazzjoni pubblika, u jipprovdu kapaċità tematika għall-promozzjoni tal-IĊE tiegħek. 

Barra minn hekk, huwa siewi li tiddefinixxi stadji importanti speċifiċi matul il-kampanja tiegħek, bħat-tnedija ta’ appelli għall-ġbir ta’ fondi meta jintlaħqu miri sinifikanti bħal 100,000 firma. Dawn l-istadji importanti jistgħu jservu bħala mumenti ewlenin biex tingħata spinta ġdida lill-ġbir ta’ fondi tiegħek u jiġi ġġenerat appoġġ addizzjonali hekk kif l-IĊE tiegħek tavvanza. 

Aħseb bħala tim: assenja rwol ta’ ġbir ta’ fondi

L-organizzaturi ta’ IĊE preċedenti rrapportaw li l-aħjar li tassenja rwoli ċari fit-tim tal-IĊE tiegħek. Il-fatt li jkollok persuna jew tim iddedikat għall-ġbir tal-fondi jiggarantixxi li l-ġbir tal-fondi ma jkunx biss ħsieb ta’ importanza sekondarja, iżda parti integrali mill-għanijiet tal-kampanja tiegħek. Il-kompiti jinkludu: 

• L-iżvilupp u ż-żamma ta’ relazzjonijiet mal-finanzjaturi. 
• Il-ħolqien u l-immaniġġjar ta’ kampanji ta’ ġbir ta’ fondi. 
• Il-monitoraġġ tal-baġits u r-rekwiżiti tar-rappurtar. 

Mhux biżżejjed li titlob id-donazzjonijiet u tiżgura l-fondi. Il-ġbir tal-fondi jinvolvi wkoll il-ħolqien ta’ sħubijiet, it-tisħiħ tal-viżibbiltà, u l-kontribuzzjoni għall-bini u l-ġestjoni tal-komunità. Is-sħab jistgħu jappoġġaw l-inizjattiva mhux bil-flus biss, iżda wkoll b’donazzjonijiet in natura, bir-riżorsi umani, jew billi jxerrdu l-messaġġ tal-inizjattiva. 

Fassal il-kampanji tiegħek

Biex IĊE tirnexxi, trid tinvolvi lis-sostenituri f’diversi pajjiżi, u dan jeħtieġ koordinazzjoni bir-reqqa u strateġiji lokalizzati. Peress li l-lingwi nazzjonali, il-kulturi u l-pajsaġġi ta’ finanzjament ivarjaw, huwa kruċjali li jitfasslu kampanji speċifiċi għall-pajjiż adatti għal kull udjenza. 

Il-preżenza tiegħek fil-media soċjali għandha tiġi adatta wkoll għad-demografija u l-preferenzi reġjonali differenti. Il-pjattaformi popolari jvarjaw skont il-pajjiż u l-età. Filwaqt li udjenzi iżgħar jistgħu primarjament jużaw Instagram u TikTok, oħrajn jistgħu jkunu aktar attivi fuq Facebook jew LinkedIn. L-implimentazzjoni ta’ strateġija mmexxija mid-data fil-pjattaformi kollha se tgħinek timmassimizza l-involviment u tilħaq kemm jista’ jkun nies. 

Lil hinn mill-metodi biex tilħaq lin-nies online, għandek tikkunsidra approċċi alternattivi bbażati fil-komunità. Filwaqt li l-kampanji diġitali jistgħu jkunu kosteffettivi, tissottovalutax is-setgħa ta’ involviment wiċċ imb wiċċ. Skont l-udjenza fil-mira tiegħek, tista’ ssib appoġġ siewi fi ħdan gruppi ta’ passatempi, ċrieki soċjali, assoċjazzjonijiet lokali, postijiet tax-xogħol, u organizzazzjonijiet tal-komunità. Għalkemm dawn il-gruppi jistgħu jkunu aktar diffiċli biex jintlaħqu inizjalment, spiss juru impenn qawwi ladarba jkunu involuti u jista’ jkollhom rwol kruċjali fil-mobilizzazzjoni tal-appoġġ għal kawża li jemmnu fiha. 

Fl-aħħar nett, immassimizza l-użu tiegħek tal-għodod tal-media soċjali biex tissimplifika l-ġbir ta’ fondi u l-involviment. Karatteristiċi bħall-buttuna “Donate” ta’ Instagram pereżempju jistgħu jiffaċilitaw il-kontribuzzjonijiet direttament fil-pjattaforma, u jagħmluha aktar faċli għas-sostenituri biex jaġixxu. 

Identifika l-ħtiġijiet tiegħek

Ibda billi tabbozza baġit dettaljat li jiddeskrivi r-riżorsi li għandek bżonn għall-kampanja tiegħek. L-organizzaturi preċedenti semmew dan li ġej fost l-ispejjeż ewlenin:  

• Riżorsi umani: X’aktarx li l-akbar parti tal-baġit tal-IĊE tiegħek se tkun l-istaff. Jekk għandek il-kapaċità finanzjarja, ikkunsidra li timpjega professjonisti għall-komunikazzjoni jew għall-appoġġ tal-IT, minbarra l-koordinaturi tal-kampanji. Il-ħolqien tal-kontenut u tas-sit web, l-immaniġġjar tal-media soċjali u l-koordinazzjoni tal-media jistgħu jeħtieġu attenzjoni speċjali. Jekk m’għandekx il-kapaċità finanzjarja, tissottovalutax is-setgħa tal-voluntiera! 
• Reklamar: Ir-reklamar diġitali għandu impatt qawwi. Madankollu, skont is-suġġett tiegħek, tista’ tikkunsidra li tinvesti kemm fir-reklami diġitali (il-media soċjali jew ir-reklami online) kif ukoll fir-reklami tradizzjonali (gazzetti, televiżjoni, radju).   

• Materjali biex tilħaq lin-nies: Stampar ta’ fuljetti, u merchandising għall-avvenimenti għal viżibbiltà fiżika. 

Ibni n-network tiegħek u kkombina r-riżorsi

Network b’saħħtu ta’ sħab huwa ta’ għajnuna enormi fl-allokazzjoni effiċjenti ta’ baġit limitat, u jista’ wkoll jiftaħ sorsi ġodda ta’ finanzjament. Meta tfittex is-sħab, immira lejn entitajiet tal-istess fehma b’għanijiet simili. Dawn jistgħu jinkludu:  

• NGOs: Identifika l-organizzazzjonijiet ewlenin li jaħdmu fuq is-suġġett tiegħek fil-livell lokali, reġjonali, nazzjonali, Ewropew jew internazzjonali.   
• Sostenituri ta’ IĊE preċedenti: Fittex il-finanzjaturi jew is-sħab ta’ IĊE oħrajn billi tuża l-informazzjoni pubblika fil-paġna web tal-IĊE. 
• Assoċjazzjonijiet tal-industrija: Fittex entitajiet tas-settur pubbliku jew privat li l-objettivi tagħhom huma allinjati mal-inizjattiva tiegħek. 
• Awtoritajiet pubbliċi: Ikkunsidra li tfittex sħubijiet mal-gvernijiet lokali jew mal-muniċipalitajiet speċjalment għall-IĊE li għandhom importanza lokali jew reġjonali. 

Meta tilħaq sħab potenzjali, enfasizza kif il-kollaborazzjoni tiegħek tista’ twassal għal benefiċċju reċiproku u l-kondiviżjoni ta’ kompetenzi, kapaċitajiet u riżorsi ewlenin. Network divers jippermettilek tinvolvi liċ-ċittadini f’reġjuni u demografiji differenti. Sħab stabbiliti sew jistgħu jagħtu l-għarfien espert tagħhom lill-kampanja tiegħek, filwaqt li jżidu l-fiduċja fost il-finanzjaturi u s-sostenituri potenzjali. Meta tikkoopera, l-użu tal-logos tas-sħab tiegħek fil-materjal tiegħek isaħħaħ il-leġittimità tal-kampanja tiegħek. 

Għal aktar informazzjoni dwar kif tibni n-network tiegħek, irreferi għat-taqsima tal-Forum tal-IĊE “Kif tfittex sħab”. 

Minn sostenitur għal donatur: Is-sostenituri tiegħek jistgħu huma stess ikunu multiplikaturi għall-kampanja tiegħek u jkunu sors b’saħħtu ta’ finanzjament. Involvihom permezz ta’: 

• Donazzjonijiet: Ipprovdi għażliet ċari dwar kif in-nies jistgħu jagħtu d-donazzjonijiet u jappoġġaw il-kampanja tiegħek. Kun trasparenti dwar kif se jintużaw il-fondi. 
• Kampanji bbażati fuq l-istadji importanti: Uża l-kisbiet tal-kampanja (eż. billi tilħaq 10,000 firma) biex tniedi appelli għall-ġbir ta’ fondi lis-sostenituri. 
• Finanzjament kollettiv: Uża l-pjattaformi biex tilħaq udjenza wiesgħa. Ħeġġeġ lis-sostenituri jaqsmu l-kampanja tiegħek fin-networks tagħhom. 

Identifika finanzjaturi potenzjali

L-identifikazzjoni ta’ finanzjaturi potenzjali hija pass kruċjali fl-iżgurar ta’ appoġġ finanzjarju għall-Inizjattiva taċ-Ċittadini Ewropej tiegħek. Biex timmassimizza l-possibbiltajiet tiegħek li tirnexxi, għandek tiffoka fuq donaturi li għandhom interess naturali fil-kawża tiegħek: dawk li jaħdmu fl-istess qasam tal-IĊE tiegħek, jaqsmu l-valuri tiegħek, u jsegwu għanijiet simili. 

Punt tat-tluq tajjeb huwa li tfittex il-finanzjaturi ta’ IĊE simili preċedenti. Ħares lejn inizjattivi preċedenti li indirizzaw kwistjonijiet relatati u eżamina minn fejn ġie l-finanzjament tagħhom. Is-sit web tal-IĊE jipprovdi informazzjoni pubblika li tista’ tgħinek tidentifika organizzazzjonijiet jew individwi li diġà appoġġaw kawżi simili. Tista’ tanalizza wkoll rapporti u rikonoxximenti minn IĊE ta’ suċċess biex tiskopri indikazzjonijiet potenzjali. 

Lil hinn mill-IĊE preċedenti, għandek tesplora bażijiet tad-data usa’ dwar il-finanzjament. Il-programm tal-Kummissjoni Ewropea dwar iċ-Ċittadini, l-Ugwaljanza, id-Drittijiet u l-Valuri (CERV) huwa programm ta’ finanzjament li jippubblika regolarment sejħiet għal proġetti relatati mal-involviment taċ-ċittadini, is-salvagwardja tad-diversità u d-drittijiet ċivili, u l-għoti tas-setgħa liċ-ċittadini fil-ħajja demokratika, fost suġġetti oħra.  

Barra minn hekk, ir-Reġistru tat-Trasparenza tal-UE, jew il-portali nazzjonali tat-trasparenza jistgħu jgħinuk tidentifika NGOs, fondazzjonijiet, u sponsors korporattivi li jiffukaw fuq is-suġġett tal-IĊE tiegħek.  

Biex tkompli tirfina t-tfittxija tiegħek, huwa essenzjali li timmappja l-partijiet ikkonċernati ewlenin fl-Istati Membri kollha tal-UE li huma involuti fis-suġġett tal-IĊE tiegħek. Ħafna finanzjaturi jippubblikaw il-prijoritajiet tagħhom f’rapporti annwali jew jelenkaw l-għotjiet reċenti tagħhom fis-siti web tagħhom. Billi tirrieżamina dawn is-sorsi, tista’ tivvaluta jekk l-IĊE tiegħek hijiex allinjata mal-istrateġiji ta’ finanzjament tagħhom u tiddetermina l-aħjar mod biex tindirizzahom. L-istabbiliment ta’ konnessjonijiet ma’ organizzazzjonijiet rilevanti, ma’ gruppi ta’ promozzjoni, u ma’ networks se jgħinek tifhem aħjar ix-xenarju ta’ finanzjament u toħloq opportunitajiet potenzjali ta’ kollaborazzjoni. 

Fl-aħħar nett, tinjorax lid-donaturi individwali. Ħafna filantropisti jappoġġaw b’mod attiv il-kawżi soċjali u politiċi u għalhekk jista’ jkollhom interess personali fl-objettivi tal-IĊE tiegħek. Biex tidentifika finanzjaturi individwali potenzjali, agħmel riċerka dwar id-donazzjonijiet preċedenti tagħhom, l-affiljazzjonijiet, u kwalunkwe dikjarazzjoni jew azzjoni pubblika li tindika l-impenn tagħhom għal kwistjonijiet simili. Jekk tinvolvi ruħek magħhom permezz ta’ networks professjonali bħal LinkedIn, avvenimenti, jew saħansitra l-media soċjali tista’ tistabbilixxi konnessjonijiet siewja u tikkonvinċihom jappoġġawk.  

Tinsiex: It-trasparenza hija essenzjali biex tibni l-fiduċja mas-sostenituri, il-finanzjaturi u s-sħab. Il-kontribuzzjonijiet kollha li jaqbżu €500 jridu jiġu ddivulgati pubblikament, flimkien mad-dettalji tal-appoġġ in natura.

Għal aktar informazzjoni, irreferi għat-taqsima tal-Forum tal-IĊE “Kif tirrapporta l-appoġġ finanzjarju”

Iddiversifika s-sorsi ta’ finanzjament tiegħek

Il-kisba ta’ appoġġ minn finanzjaturi multipli differenti tipprovdi sikurezza għall-kampanja. Esplora l-għażliet li ġejjin: 

• NGOs jew organizzazzjonijiet tas-soċjetà ċivili: Bħala l-aktar finanzjaturi komuni tal-IĊE, dawn x’aktarx li jallinjaw ma’ kawża tal-IĊE u jappoġġawha. 
• Sponsorizzar korporattiv: Avviċina l-kumpaniji li l-valuri tagħhom jallinjaw mal-inizjattiva tiegħek. Enfasizza l-benefiċċji tal-appoġġ tal-kampanja tiegħek, pereżempju reputazzjoni tajba tad-ditta tagħhom u aċċess għal udjenzi ġodda. 
• Sħubijiet pubbliċi: Fittex appoġġ mill-gvernijiet lokali, b’mod partikolari għal inizjattivi marbuta mal-interessi lokali (eż. it-trasport jew kwistjonijiet ambjentali).   
• Fondazzjonijiet jew għotjiet pubbliċi 
• Assoċjazzjonijiet tal-industrija 
• Donaturi individwali u filantropisti   

X’ifittxu l-finanzjaturi?

Meta tfittex finanzjament għall-IĊE tiegħek, huwa essenzjali li tifhem x’jipprijoritizzaw il-finanzjaturi. L-għarfien tal-aspettattivi tagħhom jgħinek tfassal l-approċċ tiegħek u żżid il-possibbiltajiet tiegħek li tiżgura l-appoġġ.

Allinjament mal-valuri u l-għanijiet tal-finanzjaturi

Il-finanzjaturi jippreferu jappoġġaw IĊE li jallinjaw mill-qrib mal-missjoni u l-valuri tagħhom. Meta tabbozza l-proposta tiegħek għalihom, ikkunsidra s-suġġerimenti li ġejjin:

• Uri b’mod ċar kif l-IĊE tiegħek tikkontribwixxi għal eżiti simili għal dawk tal-proġetti tal-finanzjatur, u kif tallinja mal-għanijiet jew il-valuri tagħhom. 
• Spjega għaliex l-inizjattiva tiegħek hija importanti u kif tallinja ma’ temi usa’ li jappoġġaw il-finanzjaturi, bħad-demokrazija, il-benesseri tal-annimali, id-drittijiet fundamentali, jew is-sostenibbiltà. 

Fatturi Ewlenin fid-Deċiżjonijiet ta’ Finanzjament

Li tifhem il-prijoritajiet tad-donaturi jista’ jagħmel id-differenza kollha biex tiżgura l-finanzjament. Il-fatturi ewlenin li d-donaturi jqisu huma:

• Is-suġġett u l-ambitu tal-IĊE — il-finanzjaturi jridu jappoġġaw inizjattivi li huma rilevanti għall-oqsma ta’ prijorità tagħhom.
• Il-pjan baġitarju dettaljat — kruċjali biex tintwera l-fattibbiltà. Tqassim ċar ta’ kif se jintużaw il-fondi jsaħħaħ il-kredibbiltà.

Missjoni ċara, struttura u pjan strateġiku

Meta jaqraw il-proposta ta’ finanzjament tiegħek jew jinteraġixxu miegħek, il-finanzjaturi jistennew li jaraw: 

• Missjoni definita sew li tispjega x’għandha l-għan li tikseb l-IĊE tiegħek. 
• Objettivi speċifiċi li jorbtu direttament mal-missjoni usa’. 
• Pjan ta’ komunikazzjoni li jiddeskrivi kif se tinvolvi lis-sostenituri, lill-partijiet ikkonċernati politiċi, u lill-media biex tilħaq l-għadd minimu ta’ firem.  

Żbalji komuni li għandek tevita

Meta tavviċina lill-finanzjaturi, ħafna organizzaturi tal-IĊE jagħmlu żbalji li jistgħu jiġu evitati. Dawn huma l-aktar komuni: 

• Stima eċċessiva tal-għadd potenzjali ta’ sostenituri. 
• Nuqqas ta’ sħubijiet internazzjonali, li l-finanzjaturi spiss jappreżżawhom. 
• L-għoti ta’ dettall insuffiċjenti fil-komunikazzjoni inizjali. 
• Nuqqas ta’ preżentazzjoni ta’ pjan ta’ komunikazzjoni ċar u realistiku. 

Monitoraġġ u responsabbiltà

Il-finanzjaturi jridu jkunu jafu kif se jintużaw il-kontribuzzjonijiet tagħhom u l-impatt li se jkollhom. Tipikament jivvalutaw l-IĊE abbażi ta’:

• L-għadd ta’ firem miġbura — li jservi bħala indikatur primarju tal-involviment pubbliku.
• Il-preżenza fil-media u fil-media soċjali — turi viżibbiltà u influwenza.
• Rapportar dettaljat — kruċjali biex il-finanzjaturi jiġu pprovduti b’aġġornamenti regolari dwar l-użu tal-fondi u l-progress fil-kampanji.
• L-impatt fuq it-teħid tad-deċiżjonijiet tal-UE — it-traċċar tad-diskussjonijiet u r-risponsi tal-politika minn dawk li jfasslu l-politika.

Ma hemm l-ebda approċċ wieħed tajjeb għal kulħadd għall-ġbir tal-fondi, kemm jekk qed timmira lejn finanzjaturi kbar kif ukoll jekk qed tiġbor appoġġ minn ħafna kontributuri żgħar, iż-żewġ strateġiji jistgħu jkunu effettivi. Ikkunsidra li tgħaqqad iż-żewġ metodi biex tiddiversifika s-sorsi ta’ finanzjament tiegħek. Finanzjaturi kbar jistgħu jipprovdu appoġġ sostanzjali, filwaqt li donaturi iżgħar jistgħu joħolqu bażi wiesgħa ta’ appoġġ u jrawmu sens ta’ komunità madwar l-IĊE tiegħek.

Finanzjament kollettiv

Il-finanzjament kollettiv huwa mod b’saħħtu biex jintlaħqu ħafna nies li jimpurtahom mill-kawża tiegħek. Dan hu metodu li bih ħafna individwi jagħtu flus – normalment f’ammonti żgħar – biex jiffinanzjaw proġett jew inizjattiva. Huwa jimmobilizza ħafna persuni fuq il-media soċjali u siti web speċjalizzati ta’ finanzjament kollettiv, li jippermettulek tiġbor kontribuzzjonijiet żgħar minn udjenza wiesgħa.

Ġbir ta’ fondi minn individwi bl-istess interess

Dan l-approċċ jieħu l-finanzjament kollettiv għal-livell li jmiss billi jippermetti lis-sostenituri tiegħek jiġbru l-fondi f’ismek. Kulħadd jista’ joħloq il-paġna ta’ ġbir ta’ fondi tiegħu stess, jaqsamha man-networks tiegħu ta’ familja, ħbieb, u kollegi biex jgħin fil-ġbir tad-donazzjonijiet. Huwa mod tajjeb ħafna kif tespandi l-firxa tiegħek u tisfrutta l-konnessjonijiet personali. 

Merchandising

Il-bejgħ ta’ oġġetti bid-ditta tal-kampanja huwa mod kreattiv kemm biex tiġbor il-fondi kif ukoll biex toħloq ditta u komunità madwar l-IĊE tiegħek. Il-merchandising jista’ jservi bħala simbolu tanġibbli tal-kampanja tiegħek, u joħloq sens ta’ komunità fost is-sostenituri.  

Oġġetti bħal brazzuletti, t-shirts, fuljetti, kards, brieret, brochures, xalel u materjal ta’ merchandising ieħor jistgħu jgħinu kemm biex jiżdied l-għarfien kif ukoll bħala flus għall-kampanja. 

Organizza avveniment għall-ġbir ta’ fondi 

L-ospitar ta’ avveniment ta’ ġbir ta’ fondi, kemm virtwali kif ukoll wiċċ imb wiċċ, jista’ joħloq eċċitament u jagħti l-opportunità lid-donaturi li jinvolvu ruħhom direttament mal-kawża tiegħek. Ikkunsidra li torganizza avveniment tematiku, irkant għall-karità, jew laqgħa tal-komunità li tlaqqa’ lin-nies flimkien filwaqt li tiġbor fondi għall-IĊE tiegħek.

Baġit eżatt ta’ IĊE jvarja ħafna skont id-differenzi reġjonali, il-prijoritajiet tal-kampanja, u l-istrateġiji li tuża biex tilħaq in-nies. Qafas ġenerali bbażat fuq IĊE li rnexxew fil-passat juri kif jistgħu jitqassmu l-fondi. Ara eżempju ta’ baġit hawn taħt: 

L-organizzaturi tal-kampanja jistgħu jikkunsidraw li jikkonsultaw IĊE preċedenti biex jirfinaw l-istimi tal-kostijiet tagħhom stess u jqisu d-differenzi fl-ipprezzar reġjonali. Firxiet baġitarji flessibbli jippermettu aġġustamenti hekk kif il-ħtiġijiet tal-kampanja jevolvu. Innota li ħafna kampanji ddependew b’mod estensiv fuq ix-xogħol volontarju. 

• Aħtar persuna jew sottotim għall-ġbir tal-fondi minn fostkom 
• Abbozza baġit bid-dettalji tal-ispejjeż antiċipati   
• Iddeskrivi l-alleanzi u s-sħubijiet possibbli ma’ organizzazzjonijiet jew sħab tal-kampanja tal-istess fehma 
• Immappja d-donaturi potenzjali billi tibda minn finanzjaturi u mexxejja ta’ IĊE preċedenti fil-qasam tas-suġġett tiegħek 
• Identifika l-istadji importanti u l-kampanji ta’ ġbir ta’ fondi korrispondenti 
• Ipprepara l-argumenti tiegħek  

L-iżgurar tal-finanzjament għall-IĊE tiegħek jista’ jidher bħala vjaġġ diffiċli, iżda tinsab fit-triq it-tajba! Ftakar, m’intix waħdek f’dan il-proċess. Jekk għandek bżonn parir imfassal apposta għalik biex jgħinek tiġbor il-fondi, toqgħodx lura milli tikkuntattja lill-Forum tal-IĊE għal gwida esperta. Tista’ wkoll tiskeda telefonata għal pariri u strateġiji personalizzati li jistgħu jikkontribwixxu għas-suċċess tal-IĊE tiegħek.