Ir-reġistrazzjoni tal-webinar hi disponibbli hawn taħt
Kelliema:
Flavio Grazian, Manager tad-Demokrazija Parteċipattiva, ECAS
Attila Dabis, Organizzatur tal-inizjattiva “Politika ta’ koeżjoni għall-ugwaljanza bejn ir-reġjuni u s-sostenibbiltà tal-kulturi reġjonali”
Helmut Burtscher-Schaden, Organizzatur ta’ “Insalvaw lin-Naħal u lill-Bdiewa! Lejn agrikoltura favur in-naħal għal ambjent b’saħħtu”
Moderatur
ELISA Lironi, Senior Manager tad-Demokrazija Ewropea, ECAS
Lingwa: Ingliż
Jekk tlift il-webinar, iċċekkja r-reġistrazzjoni bil-video (disponibbli bl-Ingliż) biex titgħallem dwar il-passi differenti tal-Inizjattiva taċ-Ċittadini Ewropej (ECI) u kif tiġbor il-firem, b’inputs ipprovduti minn żewġ organizzaturi ta’ inizjattivi li rnexxew u esperti fil-qasam.
Dr Attila Dabis hu xjentist politiku u figura pubblika, ibbażat f’Budapest, l-Ungerija. Mill-2012 ’il hawn ilu jiffunzjona bħala l-Kummissarju għall-Affarijiet Barranin tal-Kunsill Nazzjonali ta’ Szekler. Sa mill-2016 hu kien il-Koordinatur Internazzjonali tal-Istitut għall-Protezzjoni tad-Drittijiet tal-Minoranzi. Mill-2019 ’il hawn hu kofundatur u kap editur tal-ġurnal xjentifiku, Kisebbségvédelem / Protezzjoni tal-Minoranzi. Hu kkontribwixxa għal dan il-Forum bħala l-viċi rappreżentant (sostitut) tal-inizjattiva taċ-ċittadini Ewropej imsejħa “Politika ta’ koeżjoni għall-ugwaljanza tar-reġjuni u s-sostenibbiltà tal-kulturi reġjonali”.
Helmut Burtscher-Schaden hu bijokimiku u ilu jaħdem fuq l-effetti tas-sustanzi kimiċi fuq l-ambjent u s-saħħa għal kważi għoxrin sena fl-NGO Global 2000 (Friend of the Earth tal-Awstrija). Hu l-awtur ta’ diversi pubblikazzjonijiet dwar il-kontroversja li għaddejja dwar l-approvazzjoni tal-UE tal-glifosat u l-isfond xjentifiku tagħha. Permezz ta’ dan ix-xogħol ġie elett bħala “Komunikatur tas-Sena 2017”, premju mogħti kull sena mill-Assoċjazzjoni tar-Relazzjonijiet Pubbliċi tal-Awstrija (PRVA). Burtscher-Schaden kien wieħed mill-inizjaturi tal-Inizjattiva taċ-Ċittadini Ewropej (ECI) “Inwaqqfu l-Glifosat” kif ukoll l-Inizjattiva taċ-Ċittadini Ewropej “Insalvaw lin-Naħal u lill-Bdiewa” li għadha għaddejja.
Flavio Grazian hu Manager tad-Demokrazija Parteċipattiva fis-Servizz ta’ Azzjoni għaċ-Ċittadini Ewropej (ECAS), fejn jaħdem fuq l-iżvilupp u l-implimentazzjoni ta’ proġetti tal-UE, b’fokus partikolari fuq il-Forum tal-Inizjattiva taċ-Ċittadini Ewropej u d-demokrazija Parteċipattiva fil-livell tal-UE. Hu l-koordinatur tal-proġett tal-Forum tal-Inizjattiva taċ-Ċittadini Ewropej.
ELISA Lironi hi s-Senior Manager tad-Demokrazija Ewropea, li ilha taħdem mas-Servizz ta’ Azzjoni taċ-Ċittadini Ewropej (ECAS) mill-2015. Hi tiżviluppa u tmexxi l-qasam ta’ fokus tad-Demokrazija Ewropea tal-ECAS billi timplimenta proġetti tal-UE u studji ta’ riċerka relatati mad-Demokrazija Diġitali, il-Parteċipazzjoni Ċivika u l-Fehim tal-Populiżmu. Hi qed tikkoordina diversi proġetti minn programmi differenti tal-UE. Bħalissa qed tmexxi l-CODE Europe - proġett dwar il-crowdsourcing tal-ideat taċ-ċittadini dwar il-kwalità tal-arja (għotjiet taż-ŻEE), u reċentement ippubblikat l-aħħar kapitolu tagħha tal-ktieb “Crowdsourcing EU Legislation: Harnessing the Power of Digital Democracy” (ECPR Press, 2021). Mill-2018 ’il hawn, hi l-Esperta tal-ECI għall-Forum tal-Inizjattiva taċ-Ċittadini Ewropej u hi parti mit-tim li jaħdem mas-Segretarjat Ġenerali tal-Kummissjoni Ewropea dwar l-iżvilupp u l-implimentazzjoni ta’ din il-pjattaforma kollaborattiva online.
Aġenda tal-webinar
1. Introduzzjoni u merħba minn Elisa Lironi [minn minuta 1 sa minuta 6]
2. Preżentazzjoni minn Flavio Grazian, dwar l-Inizjattiva taċ-Ċittadini Ewropej, il-passi differenti tagħha u kif jinġabru l-firem [minn minuta 6 sa minuta 19]
3. Preżentazzjoni minn Attila Dabis, dwar l-inizjattiva “Politika ta’ koeżjoni għall-ugwaljanza tar-reġjuni u s-sostenibbiltà tal-kulturi reġjonali” [minn minuta 19 sa minuta 22]
4. Preżentazzjoni minn Helmut Burtscher-Schaden, dwar l-inizjattiva “Insalvaw in-naħal u lill-bdiewa! Lejn agrikoltura favur in-naħal għal ambjent b’saħħtu” [minn minuta 22 sa minuta 25]
5. Intervent minn Attila Dabis dwar l-istrateġiji u l-elementi differenti biex jirnexxilhom jinġabru l-firem għal inizjattiva taċ-ċittadini [minn minuta 25 sa minuta 37]
6. Intervent minn Helmut Burtscher-Schaden, dwar l-esperjenza tiegħu u l-fatturi li rnexxew fil-ġbir tal-firem għal żewġ inizjattivi taċ-ċittadini [minn minuta 37 sa minuta 47]
7. Mistoqsijiet u tweġibiet mal-udjenza [minn minuta 47 sa siegħa u kwart]
F’dan il-webinar, se ssib it-tweġibiet għall-mistoqsijiet li ġejjin:
- X’inhi l-Inizjattiva taċ-Ċittadini Ewropej u kif tista’ tiġbor il-firem għaliha?
- X’inhuma l-passi proċedurali differenti tal-Inizjattiva taċ-Ċittadini Ewropej?
- Fejn nista’ nsib aktar gwida dwar l-Inizjattiva taċ-Ċittadini Ewropej?
- X’inhuma l-istrateġiji li rnexxew biex jinġabru miljun firma?
- X’inhuma l-isfidi ewlenin li ltaqgħu magħhom l-organizzaturi fil-ġbir tal-firem u kif għelbuhom?
It-tagħlimiet ewlenin minn dan il-webinar huma:
- Il-proċedura formali tista’ tinqasam f’6 stadji: 1. kif tibda 2. ir-reġistrazzjoni ta' Inizjattiva taċ-Ċittadini Ewropej 3. l-istadju tal-ġbir tal-firem 4. il-proċess tal-verifika 5. is-sottomissjoni tal-inizjattiva 6. it-tweġiba għall-inizjattiva.
- Hu importanti li jkun hemm tħejjija minn qabel sew qabel ma titnieda inizjattiva. Se jkun hemm xi ftit tas-sabiħ u l-ikrah matul il-kampanja f’dak li għandu x’jaqsam mal-ġbir tal-firem. Hu importanti li jkun hemm pjanijiet ta’ kontinġenza fis-seħħ meta dan iseħħ u li jkunu persistenti matul il-kampanja.
- Hu importanti li tivvaluta l-appoġġ potenzjali tiegħek qabel il-bidu tal-fażi tal-ġbir tal-firem.
- Li jkun hemm network tajjeb ta’ sħab hu ta’ importanza kritika għall-ġbir tal-firem fl-Istati Membri differenti. Hu importanti li jinbena network bħal dan qabel il-bidu tal-ġbir tal-firem.
- Hu importanti li jinġabru aktar minn miljun firma peress li se jkun hemm xi dikjarazzjonijiet ta’ appoġġ li jirriżultaw invalidi wara l-verifika tal-awtoritajiet nazzjonali.
- Messaġġi mfasslin apposta huma effettivi ħafna biex jintlaħqu l-firmatarji potenzjali fl-Istati Membri differenti. Hu kruċjali li tidentifika wkoll l-aħjar pjattaforma biex tilħaq l-udjenzi fil-mira tiegħek.
- L-aħħar jiem tal-kampanja huma dejjem l-aktar kruċjali għall-ġbir tal-firem u għandek iżżid l-isforzi tiegħek matul dawk il-jiem.