Webinar “Kif Tiġbor il-firem għall-inizjattiva taċ-ċittadini tiegħek”, 2021

Ir-reġistrazzjoni tal-webinar hija disponibbli hawn taħt

Kelliema mistiedna:

Julie Steendam (Organizzatriċi tal-Inizjattiva taċ-Ċittadini Ewropej, Dritt għal Kura)

Ella Jakubowska (Organizzatriċi tal-Inizjattiva taċ-Ċittadini Ewropej, Nirkupraw Wiċċna - Inizjattiva tas-soċjetà ċivili għal projbizzjoni ta’ prattiki bijometriċi ta’ sorveljanza tal-massa)

Daniela Vancic (Maniġer tal-Programm Ewropew, Democracy International)

Moderatur: Flavio Grazian, Maniġer tad-Demokrazija Parteċipattiva, Servizz ta’ Azzjoni għaċ-Ċittadini Ewropej

Lingwi: EN

Jekk tlift il-webinar, ara l-video recording (disponibbli bl-Ingliż) biex titgħallem mill-esperjenza tal-organizzaturi u l-esperti tal-inizjattivi li għaddejjin bħalissa dwar strateġiji biex tintlaħaq il-mira ta’ miljun firma u l-limiti minimi differenti fl-Istati Membri. Il-kelliema jaqsmu wkoll l-esperjenzi tagħhom tal-ġbir tal-firem matul il-COVID-19 u kif tista' żżomm l-kampanji tagħhom flessibbli taħt ir-restrizzjonijiet rispettivi. Id-diskussjoni fost l-esperti tesplora wkoll l-importanza tat-tħejjija u t-tmexxija ta’ kampanji strateġiċi kemm online kif ukoll fiżikament, biex il-firem jinġabru b’suċċess.

Julie Steendam hija l-koordinatur tal-Inizjattiva taċ-Ċittadini Ewropej “Dritt għal Kura - Le għall-Profitt mill-Pandemija”. Il-kampanja tnediet f’Novembru 2020, u s’issa hija koalizzjoni ta’ aktar minn 300 organizzazzjoni Ewropea bl-ambizzjoni li jinġabru miljun firma biex tgħaddi proposta leġiżlattiva fil-Kummissjoni Ewropea biex il-vaċċini u t-trattamenti kontra l-COVID-19 isiru beni pubbliċi.

Ella Jakubowska hija uffiċjal tal-politika u tal-kampanji fin-network Drittijiet Diġitali Ewropej (EDRi). Qabel kienet taħdem għal kumpanija tal-inġinerija u t-teknoloġija u mbagħad qattgħet żmien tirriċerka l-intersezzjoni tad-drittijiet tal-bniedem, it-teknoloġija u s-soċjetà minn perspettiva soċjoloġika femminista. Ella, li twieldet fir-Renju Unit, issa tgħix fi Brussell fejn taħdem favur il-protezzjoni tad-drittijiet diġitali tan-nies fl-UE.

Daniela Vancic hija l-Maniġer tal-Programm Ewropew f’Democracy International, NGO li tippromwovi parteċipazzjoni aktar b’saħħitha taċ-ċittadini fit-teħid ta’ deċiżjonijiet politiċi, b’esperjenza fl-Inizjattiva taċ-Ċittadini Ewropej sa mill-bidu tal-għodda. Daniela għandha erba’ snin esperjenza fil-bini ta’ kampanji u networks, u għal dawn l-aħħar tliet snin, hija kienet qed twettaq il-kampanji Ewropej ta’ Democracy International. Daniela ħadmet b’mod estensiv fuq l-Inizjattiva taċ-Ċittadini Ewropej, mill-għoti ta’ pariri dwar il-kampanji u l-ġbir ta’ fondi lill-organizzaturi, sal-promozzjoni ta’ implimentazzjoni aktar b’saħħitha tar-regolamentazzjoni tal-għodda, u biex l-għodda ssir aktar magħrufa għaċ-ċittadini. 

Flavio Grazian hu Maniġer tad-Demokrazija Parteċipattiva fis-Servizz ta’ Azzjoni għaċ-Ċittadini Ewropej (ECAS), fejn jaħdem fuq l-iżvilupp u l-implimentazzjoni ta’ proġetti tal-UE, b’fokus partikolari fuq il-Forum tal-Inizjattiva taċ-Ċittadini Ewropej u d-demokrazija Parteċipattiva fil-livell tal-UE. Huwa l-koordinatur tal-proġett tal-Forum tal-Inizjattiva taċ-Ċittadini Ewropej.

L-Aġenda tal-webinar

1. Introduzzjoni minn Flavio Grazian [Minuta 0 sa 4]

2. Ħarsa ġenerali lejn l-Inizjattiva taċ-Ċittadini Ewropej minn Flavio Grazian [Minuta 4 sa 15]

3. Diskussjoni f’panel ma’ Julie Steendam, Ella Jakubowska u Daniela Vancic [Minuta 15 sa 56]

4. M&T ma’ Julie Steendam, Ella Jakubowska u Daniela Vancic [Minuta 56 sa 1:12]

F’dan il-webinar, se ssib it-tweġibiet għall-mistoqsijiet li ġejjin:

- X’inhuma s-suġġerimenti ewlenin għat-tħejjija ta’ strateġija effettiva għall-ġbir tal-firem u biex tikseb appoġġ għall-inizjattiva tiegħek?

- Kif inhu l-ġbir tal-firem għal Inizjattiva taċ-Ċittadini Ewropej fuq livell prattiku (liema lingwi, pjattaformi, u mezzi għall-użu u kif)?

- Kif tiġbor b’suċċess firem matul ir-restrizzjonijiet tal-COVID-19?

It-tagħlimiet ewlenin minn dan il-webinar huma:

- Il-konnessjonijiet personali huma importanti meta jinġabru l-firem. L-organizzaturi jistgħu jippreparaw messaġġi (għal kull tip ta’ pjattaforma, inkluż messaġġi istantanji) li dawk li jappoġġaw l-inizjattiva jistgħu mbagħad jaqsmu fin-network tagħhom biex jagħmlu l-inizjattiva tagħhom aktar magħrufa.

- Huwa possibbli li l-firem jinġabru b’suċċess filwaqt li jiġu rrispettati r-restrizzjonijiet tal-COVID-19. L-organizzaturi jistgħu jiffukaw ukoll fuq il-bini ta’ kuntatti personali permezz tat-telefonati. Huma għandhom jiżguraw li jipprovdu informazzjoni li tinftiehem faċilment biex tiġi xxerjata online u jkunu kreattivi dwar dimostrazzjonijiet simboliċi – persuna waħda li tiddefendi kawża tista’ tattira l-attenzjoni tal-media! 

- L-organizzaturi għandhom jippjanaw l-istrateġija ta’ komunikazzjoni tagħhom b’attenzjoni: huma għandhom jiddefinixxu l-udjenza fil-mira tagħhom u jfasslu l-messaġġ tagħhom billi jużaw mezzi (media soċjali, videos, artikli, telefonati, newsletters) u lingwi (lingwi uffiċjali tal-UE u anke lingwi minoritarji!) differenti. Biex l-involviment ikun faċli, dawn għandhom jissimplifikaw il-messaġġ.

- Huwa essenzjali li jkun hemm sensibilizzazzjoni attiva u bini ta’ alleanzi. L-organizzaturi għandhom jiżguraw li jikkuntattjaw lill-organizzazzjonijiet tas-soċjetà ċivili biex jagħmlu użu wkoll min-networks tagħhom u jiffukaw fuq li s-suġġett tagħhom ikun rilevanti u identifikabbli għall-pubbliku ġenerali.

- Jimmiraw il-partijiet ikkonċernati influwenti biex iqajmu kuxjenza dwar il-kwistjonijiet u jpoġġu s-suġġett fuq l-aġenda pubblika irrispettivament mill-eżitu tal-ġbir tal-firem.