L-inizjattiva tfittex aġġornament tar-regoli dwar tekniki ġodda tat-tnissil tal-pjanti

Il-Qorti Ewropea tal-Ġustizzja stabbiliet li l-organiżmi miksuba permezz ta’ tekniki ġodda għat-tnissil tal-pjanti (NPBTs) huma organiżmi ġenetikament modifikati kif definit fid-Direttiva 2001/18/KE.

Din il-liġi, minkejja l-progress xjentifiku kbir dwar it-tnissil tal-pjanti, ma ġietx aġġornata f’ 20 sena. Id-Deċiżjoni tirriżulta fi projbizzjoni impliċita tal-kultivazzjoni tal-għelejjel żviluppati bl-NPBTs, li tikkawża żvantaġġ għar-riċerka u l-agrikoltura Ewropea.

NPBTs: għodod leġittimi għal prattiki agrikoli sostenibbli

L-NPBTs huma għodod siewja għat-tnissil ta’ għelejjel aktar reżiljenti b’inqas riżorsi u f’inqas żmien: avvanz tant meħtieġ li jista’ jagħmel l-agrikoltura tal-UE aktar kompetittiva u sostenibbli fiż-żminijiet attwali tat-tibdil fil-klima, it-tibdil fid-domanda tal-konsumaturi u l-insigurtà potenzjali tal-ikel.

Moviment tal-progress xjentifiku

Bi tweġiba, aħna, grupp internazzjonali ta’ studenti li jsegwu lawrji fix-xjenzi tal-ħajja u li mhumiex sodisfatti bl-eżitu tas-sentenza tal-qorti, ippreżentajna proposta legali li tiddeskrivi aġġornament tad-Direttiva. Bdejna inizjattiva taċ-ċittadini Ewropej bl-isem ta’ "Grow Scientific Progress: Wċuħ tar-raba’!”, li ġie rreġistrat fit-25 ta’ Lulju 2019. L-inizjattiva hija favur l-innovazzjoni, is-sostenibbiltà u s-sikurezza responsabbli f’dak li għandu x’jaqsam mal-użu tal-NPBTs.

Proposta bbażata fuq ix-xjenza u d-demokrazija

Il-proposta tagħna tipproponi taħlita ta’ diversi possibbiltajiet leġiżlattivi, u hija favur distinzjoni ċara bejn l-organiżmi miksuba permezz ta’ tekniki ġodda ta’ mutaġenesi u dawk minn OĠM konvenzjonali. Dawn iż-żewġ tipi ta’ organiżmi huma fundamentalment differenti u t-tekniki użati biex jinkisbu huma teknikament distinti.

B’mod aktar speċifiku, nipproponu li niffukaw fuq il-prodott finali aktar milli fuq it-teknika nnifisha. B’dan il-mod tiġi żgurata s-sikurezza filwaqt li l-benefiċċji siewja ta’ tekniki ġodda ma jintilfux minħabba ostakli regolatorji illoġiċi.

L-essenza ġenerali tal-proposta tagħna hija li l-NPBTs għandhom ikunu permessi f’każijiet fejn jipproduċu għelejjel li ma jistgħux jiġu distinti minn għelejjel li setgħu rriżultaw minn metodi ta’ tnissil tradizzjonali.

L-għan aħħari tagħna huwa li niġġeneraw dibattitu demokratiku dwar l-NPBTs kif ukoll nirrappreżentaw liċ-ċittadini li qed jitolbu progress xjentifiku responsabbli fl-Unjoni Ewropea.

Bħalissa qed nagħmlu kampanja biex nilħqu udjenza wiesgħa u niksbu mhux inqas minn miljun firma biex insawru agrikoltura sostenibbli futura tal-UE.

Appoġġa l-inizjattiva tagħna hawnhekk, għax l-għelejjel huma importanti!